QISSA HATIM-TAI EP#31

قصّہ حاتم طائ --31--ظفرجی

حمام بارگرد ---5

کچھ دیر تو یقین ہی نہ ہوا کہ یہ وہی روُسیاہ ہے جس کی وجہ سے شام پگاہ آبلہ پاء پھِرتا ہوں- بارے قریب ہوا اور دیدے پھاڑ پھاڑ کر زیارت اس نامسعود کی کرنے لگا-

وہ زاغ صِفت بازو کھولے آگے بڑھا اور بڑے چاؤ سے بولا:

" مجھے یقین ہے آپ بہت خفاء ہونگے ... جمع خاطر رکھیے ، آج میں آپ کی تمام رنجش دور کر دونگا"

میں نے کہا:

" رنجیدہ خاطر تو میں اپنے آپ سے ہُوں جس نے آپ پر بھروسہ کیا- اب کس نیّت سے تشریف لائے ہیں ....؟؟ "

وہ بولا:

"تم بھلے جو کہو- خُدا شاھد ہے میں کلاہ بردار نہیں- اپنی بیگناہی کا یقین نہ دلا سکا تو بھلے روُ سیاہ کر کے فروش گاہ میں پِھرانا- میں اُف تک نہ کہونگا"

پھر وہ میرا ہاتھ پکڑے حمام کے اندر چلا آیا اور مجھے بیٹھنے کو کہا- میں نے بے تابی سے پوُچھا :

"بس ایک بات کا تشفی بخش جواب دے دو .... سائیکل کہاں ہے ؟؟"

وہ کہنے لگا:

" دیکھو.... اُس روز میں تم سے سائیکل لے کر ایک قرضدار کی تلاش میں نکلا تھا- سائیں والے کھوُہ پر میں نے اسے جا لیا- اس نے میری خوب آؤ بھگت کی- سامانِ ضیافت تیّار کیا اور شب بسری پر اصرار کرنے لگا- میں نے سائیکل وہیں کھڑی کی اور اس کے ڈیرے پر چلا آیا- شب گئے خیال ہوا تو اسی وقت نوکر کو بھگایا- لیکن کوئ سارق اسے پہلے ہی اڑا چُکا تھا-

اگلے یوم اس قرضدار نے میری رقم لوٹا دی- لیکن درخواست گزار ہوا کہ میرے ساتھ میانچنوں کچہری چلو- زمین کا تنازعہ ہے- آپ کی رفاقت سے شاید کچھ صورت بہتری کی نکل آئے-

ھم کچہری پہنچے تو مخالف جماعت کے لوگ بھی آن موجود ہوئے- بدقسمتی سے دونوں جتھوں میں جھگڑا ہوگیا اور بات ہاتھا پائ تک جا پہنچی- اس بلوے میں جس کے ہاتھ جو آیا خصم کے سر مارا- قریب ہی کوتوالی تھی- کوتوال بھاگا چلا آیا اور سب کو بُز گاؤ کی طرح ہانکتا بخشی خانہ لے گیا-

تقریباً ایک ماہ تک بخشی خانے میں پڑا رہا ہوں- بمشکل زرِ ضمانت دے کر رہائ ہوئ ہے- سیدھا یہاں آ گیا ہوں- اگر میں دروغ گو یا کلاہ بردار ہوتا تو دوبارہ آپ کے روُبرو ہوتا ؟؟؟ "

میں نے کہا:

" ہرچند کہ معاملہ بعید از قیاس نہیں ، مگر وہ دوچرخہ میں نے قسطوں پر خرید کیا تھا ... تمہارا قرض تو چُکتا ہوا مگر اب میں قرضدار ہوا پھِرتا ہوں "

وہ بولا:

" جو کرب تم نے اٹھایا ہے مجھے اس کا احساس ہے- اسی کے مداوا کےلئے یہاں آیا ہوں- ابھی میرے ہمراہ میانچنّوں چلو- تمہیں من پسند سائیکل خرید کر دیتا ہوں- "

میرا دل اس کی طرف سے کچھ نرم ہوا- سوچا بے خبری میں بھلے مانس کو کوستا رہا ہوں- انسان بھی کتنا ناشکرا ہے ، خواہ مخواہ بدگمانی پال لیتا ہے-

غرض کہ اس نیک طینت نے سواری منگوائ- پھر مجھے ہمراہ کئے میاں چنّوں چلا آیا اور فروش گاہِ دوچرخہ کا رُخ کیا- وہاں پہنچ کر سائیکلوں کے انبار کی طرف اشارہ کر کے کہا:

" اپنی من پسند کا دوچرخہ اٹھا لو اور خبردار جو روپوں کا خیال بھی کیا"

میں نے خوب گھوم پھِر کر سیاہ رنگ کی ایک سھراب پسند کی- اس نے سائیکل نکلوائ اور دوزانو بیٹھ کر اس کا معائنہ کرنے لگا- پھر سائیکل فروش سے کہا کہ کاٹھی ذوقِ سلیم کے مطابق نہیں- وہ بیچارہ دوڑا دوڑا کسی دوسری دکان سے ولائتی کاٹھی پکڑ لایا- پھر دستہ پر لگانے کو نئے آئینے منگوائے- دونوں پہیوں کے بیچ رنگین پھولداریاں لگوائیں- پھر مجھ سے کہا کیوں نہ دستے پر ایک لالٹین برقی بھی نصب کروا دی جائے ، شب گردی میں سہولت ہو گی-

میں جو مارے التفات کے گڑا جا رہا تھا ، کیا کہ سکتا تھا بجز اس کے کہ آقا کیوں فضول خرچی کرتے ہیں آپ نے سائیکل بخش دی ، یہی غنیمت ہے!!"

وہ بولا:

" بدگمانی شیطان کا ہتھیار ہے- اس سے وہ بھائ کو بھائ سے جُدا کرتا ہے- تمہارا دِل جو مجھ سے مکدّر ہوا شاید اس لالٹین سے روشن ہو جائے "

اس کے بعد وہ دکاندار کو ہزار کا نوٹ تھما کر بولا:

" بازار سے ولائتی نسل کی برقی لالٹین منگوا دیجئے ... ڈیمنو سمیت !!!"

دکاندار پیسے پکڑے بازار کو دوڑا- وہ شخص سائیکل کے پاس بیٹھ کر رکابی گھمانے لگا- پھر قدرے تشویش سے بولا-

" لگتا ہے زنجیر میں کسی قدر اکڑاؤ ہے اور سگانِ دوچرخہ بھی آوارہ ہوئے پھرتے ہیں- ذرا چلاؤں تو اطمینان ہو "

میں نے کہا:

"آقا ضرور .... شوق سے سواری فرمائیے ... باعثِ تکریم و افتخار ہو گا "

غرض کہ وہ گدّی پر تشریف فرماء ہوا- پھِر کچھ دیر کو وہیں کھڑا گھنٹی بجاتا رہا- پھر پاؤں رکاب پر دھرا اور یوُں گیا ... یوُں گیا کہ آج تک لوٹ کر نہیں آیا-

STORY: Qissa Hatim Tai (Episode 31)

SUB STORY: Hammam Bargurd.5

Written By: Zafar Gee

Theme: Deception & Fraud

 Based on real stories